మధుర భావనలు

భార్గవి/ నేడిక శెలవు చెప్పుకుందాం నేస్తం!

నేడిక శెలవు చెప్పుకుందాం నేస్తం!
తోడు నడవలేక
నీడలు తూలిపోతున్నాయి...
నీరసంగా వ్యథలు
నిదురపోతున్నాయిక...

కాలమ్ చాలక
గడియారం ఒక్క సెకనులోనే
11 అంకెలు మింగేసి
ఈ రేయి  ఒంటిగంట
దగ్గరే ఉరేసుకుంది!!

కొన్ని రెక్కలు ఇంకా
దిక్కులు వెతుక్కుంటూ
గూడు కోసం
తిప్పలు పడుతున్నాయ్!
గింజపడక పొట్టలో ఆకలి
పేగుల్ని నములుతుందిపుడు!!
నువ్వు వెళ్ళిపో నేస్తం!
నేడిక శెలవు చెప్పుకుందాం!!

రాతిరి కత్తులకు తెగిన
చుక్కలేమ్ చెప్తాయో !?
సముద్రాలన్నీ మింగిన
మబ్బులెక్కడ దాక్కున్నాయో!?
లోకం సమాధిలో
నిద్రిస్తున్న జీవశ్చవాల
కలలో కలుసుకుని
చర్చించాలిప్పుడు!
నేడిక శెలవు చెప్పుకుందాం!!