ఆ:!

ఆ:!

నిప్పులు చిమ్ముకుంటూ 

నింగికి నేనెగిరిపోతే,

నిబిడాశ్చర్యంతో వీరు-

నెత్తురు క్రక్కుకుంటూ 

నేలకు నే రాలిపోతే,

నిర్ధాక్షిణ్యంగా వీరే...

-శ్రీశ్రీ 

మహాప్రస్థానం 

2-2-1935

అవతలి గట్టు

అవతలి గట్టు 

ఇవేమిటీ వింత భయాలు?

ఇంట్లో చీకటి!

ఇవేమిటీ అపస్వరాలు?

తెగింది తీగ!

అవేమిటా రంగుల నీడలు?

చావు, బ్రదుకూ!

ఎచటికి పోతా వీ రాత్రి?

అవతలి గట్టుకు!

-శ్రీశ్రీ

మహాప్రస్థానం 

16-06-1934 

ఐ

 ఐ

భూతాన్ని, యజ్ఞోపవీతాన్ని, 

వైప్లవ్య గీతాన్ని నేను!

స్మరిస్తే పద్యం,

అరిస్తే వాద్యం,

అనల వేదిక ముందు ఆశ్ర నైవేద్యం!

లోకాలు, భవభూతి శ్లోకాలు,

పరమేష్టి జూకాలు న మహోద్రేకాలు!

నా ఊహ చాంపేయమాల!

రస రాజ్యడోల!

నా ఊళ కేదార గౌళ!

గిరులు సాగరులు, కంకేళికా మంజరులు,

ఝరులు నా సోదరులు!

నేనొక దుర్గం!

నాదొక స్వర్గం!

అనర్గళం, అనితరసాధ్యం, నా మార్గం!

                                                         

                                                                        -శ్రీశ్రీ 

                                                                 మహా ప్రస్థానం 

                                                                  01-06-1934 

కళారవి

కళారవి 

    పోనీ, పోనీ!

    పోతే పోనీ!

    సతుల్, సుతుల్, హితుల్ పోనీ!

    పోతే పోనీ!

    రానీ, రానీ,

    వస్తే రానీ!

    కష్టాల్, నష్టాల్,

    కోపాల్, తాపాల్, శాపాల్ రానీ!

    వస్తే రానీ!

    తిట్లూ, రాట్లు , పాట్లు, రానీ!

    రానీ, రానీ!

    కానీ, కానీ!

    గానం, ధ్యానం!

    హాసం, లాసం!

    కానీ, కానీ!

    కళారవీ! పవీ! కవీ!

                                                 -శ్రీశ్రీ 

                                              మహా ప్రస్థానం 

                                              11-07-1934 

మహా ప్రస్థానం

మహా ప్రస్థానం 

మరో ప్రపంచం,

మరో ప్రపంచం,

మరో ప్రపంచం పిలిచింది!

పదండి ముందుకు,

పదండి త్రోసుకు!

పోదాం, పోదాం పైపైకి!

కదం త్రొక్కుతూ,

పదం పాడుతూ,

హృదంతరాళం గర్జిస్తూ-

పదండి పోదాం,

వినబడలేదా 

మరో ప్రపంచపు జలపాతం?

దారి పొడగునా గుండె నెత్తురులు 

తర్పణచేస్తూ పదండి ముందుకు!

బాటలు నడచీ,

పేటలు కడచీ,

కోటలన్నిటిని దాటండి!

నదీ నదాలూ,

అడవులు, కొండలు,

ఎడారులా మనకడ్డంకి?

పదండి ముందుకు,

పదండి త్రోసుకు!

పోదాం, పోదాం, పైపైకి!

ఎముకలు క్రుళ్ళిన,

వయస్సు మళ్ళిన,

సోమరులారా చావండి!

నెత్తురు మండే,

శక్తులు నిండే,

సైనికులారా! రారండి!

"హరోం! హరోం హర!

హర! హర! హర! హర!

హరోం హరా!" అని కదలండి!

మరో ప్రపంచం,

మహా ప్రపంచం,

ధరిత్రి నిండా నిండింది!

పదండి ముందుకు!

పదండి త్రోసుకు!

ప్రభంజనం వలె హోరేత్తండీ!

భావ వేగమున ప్రసరించండీ!

వర్షకాభ్రముల ప్రళయ ఘోషవలె

పెళ పెళ పెళ పెళ విరుచుకు పడండి!

పదండి,

పదండి,

పదండి ముందుకు!

కనబడలేదా మరో ప్రపంచపు 

కణకణ మండే త్రేతాగ్ని?

ఎగిరి, ఎగిరి, ఎగిరి పడుతున్నవి

ఎనభై లక్షల మేరువులు!

తిరిగి, తిరిగి, తిరిగి సముద్రాల్ 

జల ప్రళయ నాట్యం చేస్తున్నవి!

సలసల క్రాగే చమురా? కాదిది

ఉష్ణ రక్త కాసారం!

శివ సముద్రమూ,

నయాగరా వలె 

ఉరకండీ, ఉరకండీ ముందుకు!

పదండి ముందుకు!

పదండి త్రోసుకు!

మరో ప్రపంచపు కంచు నగారా

విరామమెరుగక మ్రోగింది!

త్రాచులవలెనూ,

రేచులవలెనూ,

ధనంజయునిలా సాగండి!

కనబడలేదా మరో ప్రపంచపు 

అగ్ని కిరీటపు ధగధగలు,

ఎర్రబావుటా నిగనిగలు,

హోమజ్వాలల భుగభుగలు?

                                                   -శ్రీశ్రీ

                                            మహా ప్రస్థానం

                                             12-04-1934

మౌనం

          మౌనం...!
          విహంగం!
          తరంగం!
          మృదంగం!

                        మౌనం...!
                        కారణం!
                        దారుణం!
                        మరణం!

                                    మౌనం...!
                                    చూసే వేళ!
                                    నవ్వే హేళ!
                                    సాగే లీల!
                                                                                                                                               
                                                    మౌనం...!                
                                                    యోచన!
                                                    లోచన!
                                                    వంచన!

    మౌనం...!
    సంధ్య తెమ్మెర!
    నవ్వుల దొంతర!
    మధుర కిన్నెర!
                                                                                                                                                                                                                                            
                     మౌనం...!
                     హృదయాన ఉదయం!
                     పయనాన గమనం!                                                                                                       
                                                                                      
                                              మౌనం...!                                                                                           
                                              ప్రాణానికి ముందు వెనుక!                                                                                         
                                              శూన్యానికి వెనుక ముందు!                                      
  
                                                                     మౌనం...!
                                                                     ఆదిలో అంతం! 
                                                                     అంతంలో ఆద్యం!

-భార్గవి 

29/11/12

నేనేమిటో...!

29/11/12

నిధ్దురలేని కనులకు తెలుసు!
మెలకువ లేని కాలాలకు తెలుసు!
మౌనం చాటున మనసుకు తెలుసు!
నేనేమిటో...!

తడుముకుంటున్న గుండెను అడుగు!

శూన్యం వెనుక కాలాన్ని అడుగు !

సాగలేని ప్రతి అడుగును అడుగు!

నేనేమిటో...!

~ భార్గవి కులకర్ణి 

అతడు ఆమె

13/12/08

అతడు.....!!

గుట్టు తెలిసిన వాడు!
కనికట్టు చేసేవాడు!!
గుండె చాటున నక్కేవాడు!
గుండె కోసిచ్చేవాడు!!
గుండెను గుచ్చేవాడు!
గుడి గంటలు మ్రోగించేవాడు!!

ఆమె....!!

చూపు గారడీ చేసేసేది!

చూపులకే దొరకనిది!!

పరుల సిగ్గులే పలికేది!

పాప పుణ్యాలు లేక్కేసేది!!

మౌనంగా రోధించేది!

మురిపాలు పండించేది!!

-భార్గవి కులకర్ణి 

Street children

27/11/12

చిరిగిన కాగితం బతుకులు...
కల్లల లోకపు కలం విదిలించిన
కన్నీటి సిరా చుక్కలు...
చిరునవ్వుల పట్టుదారాలు!

కర్మలు తెలియని 
కల్మషమెరుగని
కారు మబ్బులను
కనుదోయి దాచిన...

కాటుకలంటని
చీకటి చూపులు!

పాలపుంతలు,
పన్నీటి చినుకులు,
పలకరింపుతో
ఒలికిస్తారు!

కీచక కరవాలంతో
అరాచకమింక ఆపండి!
కలం పట్టుకు, పదం వద్దకు
పథం చూపుతు నడపండి!

ఎగిరిపోయే సీతాకోక
చిలుక రెక్కలు వదలండి!

మెరిసే చుక్కలనంటే
విరిసే నవ్వుల పువ్వులు
కోసిరిన ఆనందాలను
ఆస్వాదించండి!

-భార్గవి కులకర్ణి 

లలితద్రితి.బ్లాగ్స్పాట్.కాం 

సంధ్య - దేవరకొండ బాల గంగాధర తిలక్

గగనమొక రేకు
కన్నుగవ సోకు
ఎరుపెరుపు చెక్కిళ్ళ విరిసినది చెంగల్వ
సంజె వన్నెల బాల రంగు పరికిణి చెంగు
చీకటిని తాకినది అంచుగా
చిరుచుక్క ప్రాకినది

వాలు నీడలా దారి నీలి జండాలెత్తి
చుక్క దీపపువత్తి సొగయు బాటలనల్ల
నిదుర తూలెడి నడక గదుము మైకపు  కోర్కె
వచ్చు నిశిలో కరిఇగి నవ్వు శశిలో కలిసి
సంజె వన్నెల బాల రంగు రంగు రుమాల
విరిసింది కలలల్లు
వెండి తోటల మధ్య
వ్రాలినది వ్రాలినది తావిగా
సోకినది సోకినది

సంజె పెదవుల  కడలి అంచుల విరిగి
సంజె పరికిణి చెరగు ఎడద లోతుల మెరసి
ఏటి కొంగల నిదుర ఎర్రగా ప్రాకింది
బాతు రెక్కల నీడ బరువుగా సోలింది
సంజె వన్నెల చాలు స్వర్ణ స్వర్ణది ధార
వయసు మైకపు జీర కరగు మబ్బుల తేల


గగనమొక రేకు
కన్నుగవ సోకు

1941

 - దేవరకొండ బాల గంగాధర తిలక్ 

అమృతం కురిసిన రాత్రి 

నా కవిత్వం - దేవరకొండ బాల గంగాధర తిలక్

నా కవిత్వం కాదొక తత్వం 

మరికాదు మీరనే మనస్తత్వం 

కాదు ధనికవాదం, సామ్యవాదం 

కాదయ్యా అయోమయం, జరామయం.

గాజు కెరటాల వెన్నెల సముద్రాలూ 

జాజిపువ్వుల అత్తరు దీపాలూ 

మంత్ర లోకపు మణి స్తంభాలూ 

నా  కవితా చందనశాలా సుందర చిత్ర విచిత్రాలు.

అగాధ బాధా పాథః పతంగాలూ 

ధర్మ వీరుల కృత రక్త నాళాలూ 

త్యాగశక్తి ప్రేమరక్తి శాంతిసూక్తి 

నా కళా కరవాల ధగద్ధగ రవాలు 

నా అక్షరాలు కన్నీటి జడులలో తడిసే దయాపారావతాలు 

నా అక్షరాలు ప్రజాశక్తుల వహించే విజయ ఐరావతాలు 

నా అక్షరాలు వెన్నెలలో ఆడుకునే అందమైన ఆడపిల్లలు.

~1941

దేవరకొండ బాల గంగాధర తిలక్

అమృతం కురిసిన రాత్రి  

నువ్వెక్కడ...??