మధుర భావనలు

భార్గవి/ కూలికి బోరా కొడకా!
గట్కబువ్వ తిన్రాలేద్రా పొద్దుగాల?
ఏమొ గుస్సజేస్థున్నౌ!
అమ్మ అయ్యలేని
అనాథ ఎదవవు
ఏం సదువుల్రా సిన్నా
ఎందుకు పనికొస్తయ్

ఎంగిలిషు సదవనీకీ
నీ అయ్య ఏంమిగిలిచ్చిండు?
సాని సందులల్లబడి
తాగి తాగి సచ్చిండు

గూడుకీడ దిక్కులేదు
గుడ్డలేడ ఉన్నయ్ రా?!
మళ్ళ మళ్ళ అడిగితే
మక్కెలిరగ దంత బిడ్డ!

పసిబిడ్డవ్ గావు కొడ్క
పన్నెండేండ్లచ్చినయ్
కూలి లేని నాడు నీకు
ఖాళి కడ్పే మిగుల్తది

గొట్టు గుండెర నీది
గంటలెక్క మోగుతుంది
తిండి లేని గుండెల ఇంక
బండబారని తడుంది
ఎండ్క పొయ్న కట్టెనుగూడ
ఏట్ల పడదోస్తుంది!

భుజాలన్నమ్ముకుని
భూములమ్ముకున్నోల్లమ్
కను కొల్కిల కాల్వగట్టి
దినామ్ తడ్పుతం పొలం

పొద్దుగల పొద్దుగాల
బురదగప్కొని తిరిగేటోల్లం
పొధ్ధుగూకినంక రూపం
చమురు ఇంకిన దీపమ్

కూలికి బోరా కొడ్కా
ఇంత కూడన్న దొరుకుతది
ఇర్కుల బత్కులు మాయి
ఇరగబూశిన ఆశలు నీయి

తిండిలేక, నిద్ర లేక
పీక్కపొయ్న కండ్లు జూసి
ఒళ్ల పండబెట్టుకోను
అమ్మ లేదీడ నీకు


పోర పోరగా నువ్వు
జల్ది వోయి పన్ల జేరు
06Sep13