భిక్షువర్షీయసి
దారిపక్క చెట్టు క్రింద
ఆరిన కుంపటి విధాన
కూర్చున్నది ముసల్దోకతె
మూలుగుతూ ముసురుతున్న
ఈగలతో వేగలేక
ముగ్గుబుట్టవంటి తలా
ముడతలు తేరిన దేహం
కాంతిలేని గాజుకళ్ళు
తనకన్నా శవం నయం
పడిపోయెను జబ్బుచేసి
అడుక్కునే శక్తిలేదు
రానున్నది చలికాలం
దిక్కులేని దీనురాలు
ఏళ్ళు ముదిరి కీళ్ళు కదలి
బతుకంటే కోర్కె సడలి
పక్కనున్న బండరాతి
పగిదిగనే పడి ఉన్నది
ఆ అవ్వే మరణిస్తే
ఆ పాపం ఎవ్వరిదని
వెర్రిగాలి ప్రశ్నిస్తూ వెళ్ళిపోయింది
ఎముక ముక్క కొరుక్కుంటు
ఏమీ అనలేదు కుక్క
ఒక ఈగను పడవేసుకు
తొందరగా తొలగే తొండ
క్రమ్మే చిమ్మ చీకట్లు
దుమ్మురేగే నంతలోన
ఇది నా పాపం కాదనె
ఎగిరి వచ్చే ఎంగిలాకు
No comments:
Post a Comment