మధుర భావనలు

పొద్దు పొద్దున్న పొగ మంచు అలికిన ఆకిట్ల
ఆవు కాడికి దూడనిడిసినట్టు...
నలుగు పెట్టి లాల పోస్తున్న అమ్మ తెలిసినట్టు
నిన్ను చూసి నే నవ్వుకుంటాను!
నీ గుండె పిలిసినట్టు
కృష్ణ పక్షం లో సందమావ మూతి ముడిసినట్టు
లేగ దూడ పాలు కుడిసిన సద్దుకు
పాణం గుండెనిడిసి గుప్పిట్లో ముడుసుకున్నట్టు
గుడిసెంతా కళ్ళు సేసుకుని
పున్నమి కురిసినట్టు
పందిరి మీద సిందులేస్తున్న మల్లి విరిసినట్టు
రేతిరంతా రేపు లేనట్టు మురిసినట్టు
మల్లె గాలి ముసిరినట్టు...
నిన్ను చూసి నే నవ్వుకుంటాను
ఒడిసిపట్టిన మెడ సుట్టూ
మడిసి పెట్టిన నీ చేతి కింద
నలుగుతున్న నా సెవుల్లో
గడుసు గుండెతో సిటికేలేత్తావు
మసక తుడిసిన గతం లో మసిని మరిసినట్టు
పడుసు కళ్ళిపుడు తడిసినట్టు
కునుకు కాటుక తీసి నీ బుగ్గ సుక్క పెట్టి
నిన్ను చూసి నే నవ్వుకుంటాను!
-భార్గవి
2/11/18